Танзани улсын Ерөнхийлөгч Жон Магуфули сөрөг хүчний зүгээс дахин сонгууль зохион байгуулахыг шаардаж байсан ч Пүрэв гаригт тангаргаа өргөжээ. Тэрбээр ард иргэдийн 84 хувийн дэмжлэг авсан гэж мэдэгдэж байгаа ба ийнхүү дахин таван жилийн хугацаатай тус улсыг удирдахаар болж байна.

Өнгөрсөн аравдугаар сарын 28-ны өдөр болсон сонгуулийн үеэр нэр дэвшигчид болон жагсагчдыг баривчлах, олон нийтийн мэдээллийн хэрэгслийг хаах, улс төрийн намуудын төлөөлөгчид санал авах байранд нэвтрэхийг хязгаарлах, олон удаа санал өгөх зэрэг шударга бус үйлдлүүд даамжирсан гэж тус улс дахь АНУ-ын Элчин сайдын яам мэдээлжээ. Долоо хоногийн эхээр сөрөг хүчний эвслийн удирдагчид сонгуулийн үр дүнг эсэргүүцэж, Магуфулиг Ерөнхийлөгчийн суудалд дахин суух ёсгүй гэж мэдэгдэж байсан юм. Гэсэн ч Танзанийн цагдаа нар сөрөг хүчний гол нам болох “Чадема” намын удирдагч Фрийман Мбовег бусад дөрвөн удирдагчийн хамт хууль бус жагсаал цуглаан зохион байгуулсан хэмээн баривчилжээ.