Этиопын Ерөнхий сайд Абий Ахмед хойд Тиграй муж руу цэргээ оруулах тушаал өгчээ. Тиграйн Ардын Чөлөөлөх Фронт (TPLF)-оос бүс нутгийн нийслэл Мехелле мужийн холбооны цэргийн бааз руу дайрсаны хариуд ийм шийдвэр гаргасан байна.

Абий Тиграйн ардын чөлөөлөх фронтыг холбооны эвлэрүүлэн зуучлах, яриа хэлэлцээ хийх хүчин чармайлтыг үгүйсгэж, харгис, хэнэггүй үйлдэл гаргаж байна хэмээн буруутгажээ. Харин Тиграй мужийн захирагчийн үүрэг гүйцэтгэгч Дебрецион Гебремайкаел хурцадмал байдал үүссэн учир өөрсдийгөө хамгаалж байна гээд, ийм нөхцөл байдал үүссэнд Холбооны Засгийн газар буруутай гэж үзэж буй аж.

Холбооны засгийн газар Тиграй хотод зургаан сарын хугацаатай онц байдал зарласнаар бүх эрх мэдлийг өөрсдийн гарт оруулах боломж бүрджээ. Орон нутгийн сэтгүүлчдийн мэдээлж буйгаар, энэ бүс нутгийн интернет, харилцаа холбооны шугамыг тэр чигт нь зогсоосон байна. Ийнхүү хоёр хүчин мөргөлдөж эхэлсэн тул хөрш зэргэлдээ Судан улс болзошгүй аюулаас сэргийлэн хилээ хаажээ. Тиграй дахь хурцадмал байдал наймдугаар сард Абийн Засгийн газар Сovid-19-ийн эрсдэл хэт өндөр байна гэж үзэн, товлосон сонгуулийг хойшлуулснаар эхэлсэн юм.