Засгийн газраас гаргасан шийдвэрийн хэрэгжилттэй холбоотой мэдээллийг УОК-ын дарга, Шадар сайд Я.Содбаатар танилцууллаа. Түүний хэлж байгаагаар"Зургаан аймаг, Улаанбаатар хотод Засгийн газрын нөөц хөрөнгөөс 3 тэрбум төгрөгийн дэмжлэг олгохоор шийдвэрлэлээ. Цар тахалтай холбоотойгоор төлөвлөөгүй зардал ихээхэн гарсан тул ийнхүү санхүүгийн дэмжлэг үзүүлнэ.  

Засгийн газраас 23 төрлийн арга хэмжээг хэрэгжүүлж байгаа. Үүнтэй холбоотойгоор зарим хуулийн төсөлд өөрчлөлт оруулах шаардлага гарч байна. Цар тахлын үед гэр хорооллын иргэдэд дэмжлэг үзүүлэх зорилгоор 220 гаруй мянган өрхөд сайжруулсан түлшийг 50 хувиар хөнгөлөлттэй үнээр худалдаална. Уг хөнгөлөлт маргаашаас эхлэн дөрөвдүгээр сарын 1-н хүртэл үргэлжилнэ. Нэг тонныг 75,000 төгрөгөөр худалдана.

Коронавирусийн халдвар дотоодод тархсанд хяналт тавин ажиллаж байна. Энэ хүрээнд халдвар тархаж болзошгүй найман цэгт хяналтын баг очиж ажиллана. Нэгдүгээрт ХӨСҮТ-д ажиллана. Хоёрдугаарт тусгаарлах байранд хяналт тавина.

Гуравдугаарт Сүхбаатар, Алтанбулаг боомт, Цагааннуур, Эрээнцав боомтод ажиллана. Зайлшгүй шалтгаануудын улмаас боомтуудыг хааж болохгүй. Нефть бүтээгдэхүүн тээвэрлэн оруулж ирдэг боомтуудыг хаавал шатахуун литр тутамд дунджаар 150 төгрөгөөр нэмэгдэх эрсдэлтэй. Боомтуудад ажиллах ажлын хэсгүүд замдаа гарсан байгаа. Мөн Замын-Үүд боомтод дотоодын халдвар гарсан тул тэнд ажлын хэсэг ажиллаж байгаа. 

Эрүүл бүсээр зарлаж буй Өмнөговь аймагт онцгой анхаарч байгаа. Түүнчлэн Орхон аймаг зэрэг найман цэг тусгайлсан чиг үүрэг бүхий ажлын хэсэг ажиллах юм" гэв.